Kissagoi

Kahaani sunane ki kala ko ‘Kissagoi’ kehte hai. Jab bachchon ko unki didi ya naani vividh bhaav aur bhangimaon ke saath kahaaniyan sunati hai, ya jab hum apne kareebi doston ke beech apni baatein mirch-masala laga kar sunate hai, tab sunne-wale par uska ek prabhav padta hai. Unmein kayi saari kahaaniyan hume zindagi bhar yaad reh jaati hai. Kahaani kitni prabhavkari hogi yah kahaani sunne-wale ki prakriti aur kahaani bayaan karne ki kala par nirbhar karta hai. Ek achchha kahaanikar apni abhivyakti se kahaani ko yaadgaar bana sakta hai, wahi doosri taraf ek achhi kahaani bhi kahaanikar ki shithil-ta se neeras ho jaati hai. Lekhak Kumar Ravi ne saat kahaaniyon ke is sankalan ko ‘Kissagoi’ ka naam diya hai. Alag alag paristhitiyon mein saji ye kahaaniyan kahaanikar ki kissagoi se judi hai. Is kitab ke saath kahaaniyan hai, ‘Raste ka safar’, ‘Khamosh chehre’, ‘Humsafar Raj’, ‘Parvarish’, ‘Panipoori-wala’, ‘Ye meri kahaani hai’, aur ‘Mukaam’. Inmein se har kahaani ek doosre se behad alag prakar ke hai aur yah baat nishchit hai ki is kitab ke pathak ise zaroor pasand karenge. Ab dekhna bas yahi hai ki lekhak ki in kahaaniyon se pathak khud ko kitna jod paate hai aur yah kab tak unke saath safar karti hai.