Parakhnali

Parakhnali – yaani test tube, wahi jismein bachhe chemistry ki lab mein experiment karte hain – kabhi usmein kuchh anokha rang ubhar aata hai, toh kabhi na jaane kaun si rasayanik prakriya kya toofan le aati hai. Kabhi kabhi to visphot bhi ho jaata hai.

Aisi hi kuchh ghatnayein hain Akbar Azam ke kahaniyon ke sangrah mein. Kasbon aur gaon se lekar shahar tak, Dilli se lekar Samarkand tak, samaaj ki reetiyon ko laanghti hui, bahurupiyon ke bhes mein chhupi hui, bakriyon ke peechhe tek lagaati hui aur Samagra aur Ranjana ki chaadar mein lipti hui – ye na jaane kitne rajnigandha ke phool saath mein laayi hain. Samay badlaav ka hai par na toh gaon masoom hai na hi shahar haivaan. Dono badlaav ke chakra mein apni-apni dhun par ghoom rahe hain. Agar Brahmanvaadi soch par sawal uthte hain toh dusri ore deen ki baat karne-walon ke liye bhi kai masle hain. Jamuniya agar vidhwa ho gayi toh kya use phir se pyar karne ka haq hai? Jhilmil, jo andhi paida hui, kya uske naseeb mein andhera hi rahega? Ek gaon ki ladki jo khet mein kaam karti hai, uska Miss India se kya lena-dena ho sakta hai? Sudha ka apni parivar ki sampatti pe koi haq nahin? Aur Mahabharat ka Shakuni kya sach-much ek feminist tha? 

Parakhnali ka kaam hamesha jawab dena nahin hota. Lekin ismein ubharte sanwarte kuchh anokhe vichaar agar hum udhaar le paayein, toh hamari parkahnaliyon mein zarur kuchh naye dhang ke rang utar aayenge.