Capítulu 1 - ¡Esto ye Ciares!

Averámonos a la zona Este de la ciudá de Xixón. Un requexu del mundu onde dalgo más de 16.000 persones desarrollen los sos proyectos de vida, texen les sos redes sociales y sentimentales. Falamos del barriu de Ciares, ún de los barrios obreros y con más Historia de la ciudá qu’anguaño vive, non ayenu al mundu, nesa batalla ente’l ser y querer ser. Pero como en too, pa saber el destín, ye importante conocer quién somos y d’ú venimos.